大同機械（118）受惠市場復蘇，又享受聯營A股龐大增值潛力，股價落後，要買。大同聯營浩寧達儀錶新春前深圳上市，大同先飲頭啖湯，獲利2億銀。而浩寧達主打產品，食正祖國智能電網全面建設期，生意長做長有，對上大同，繼續肥仔。以大同應佔浩寧達權益計，等值13.6億銀，大同總市值都係得6億銀，聯營股本大升值，大同家底水漲船高。
再講，呢期市場炒復蘇，同樣本業主打塑機嘅震雄集團（057），短短半個月升咗30%，創1年新高，但大同現價0.88元，仲未升穿1月嘅1年高位1.06元。呢轉買大同落後，博上番重秤前NAV1.36元，大同講緊要翻半番，而2010年度核心業務溢利嘅預期PE，都係得13倍，未有耐追上同類20倍水位。
勤達短炒望賺兩成
勤達集團（1172）喺廣東肇慶墓園項目，單係現有用地，達到418畝（約27.9萬平方米）。復活節長假，有報道指祖國墓地價急升，每平方米3萬至7萬銀人仔不等。係咁意攞中間數5萬銀，再打多個五折，項目價值都高達80億港銀，而勤達家陣市值，3億銀唔夠。勤達可以好肥仔，兼值得長線追蹤。先嚟轉短打，博勤達升20%到0.32元，集團未有耐上到NAV0.48元。
錢雋