5.16係公投大日子，公、社兩黨不容有失，塘邊鶴民主黨輕鬆得多，立法會議員甘乃威仲聯同東區區議員梁淑楨、趙家賢，喺5月15、16日舉辦東莞美食兩天團，好多泛民支持者質疑白鴿黨太冇義氣，唔助選都算啦，仲要拉走啲街坊拖低投票率。
公民黨陳家洛得悉事件後，即時搵民主黨東區支部主席李健賢講數。陳家洛同八方講，民主黨解釋，曾討論過應否押後出團，但由於呢個係同街坊慶祝母親節活動，已舉辦好多年，今年咁啱啱撞正補選投票日先鬧出風波，為免街坊掃興，所以決定如期出發。
梁淑楨稱16號晚最遲9點鐘就返到香港，票站仲未閂門，如果街坊想投票，有的是時間。