「我們總是先讀到愛情小說，後知道愛。」小妹都係睇咗祖師奶奶張愛玲嘅小說，之後先真正拍拖。第一本睇嘅係《傾城之戀》，之後像所有張迷一樣，「我們回不去了」，一直追到《對照記》，恍然若失。好在舊年有本《小團圓》「止渴」。
4月15日出版
一年過後，張愛玲再有遺作面世，TheFallofthePagoda（《雷峯塔》英文原著）（圖）會喺4月15日出版，係祖師奶奶喺《小團圓》之前寫成嘅英文小說，只係上部，下部TheBookofChange（《易經》）9月先出。小說以上世紀二、三十年代上海做背景，女主角4歲時，母親放洋海外，跟住父母離異，父親再娶，同張愛玲喺《私語》寫嘅童年往事好似。本書同《小團圓》一樣，都充滿自傳色彩。
張愛玲遺產執行人宋以朗4月15日下午3點，會喺港大圖書館嘅新書發佈會，捐贈張作品TheFallofthePagoda同LongRiver英文原稿副本畀港大，仲會分享佢對張愛玲晚期寫作嘅睇法。無論大家點睇宋先生將張嘅遺作陸續曝光，但作為讀者真係想睇多幾本。
大家可以去呢個網址優先訂書 http://www.hkupress.org/book/9789888028368.htm，每本 $150，網上訂仲有9折，精裝版就賣$240。由於郵遞時間，相信本地讀者一定係最早睇到嘅。咁都要爭？冇辦法，張迷，一輩子講的是張，念的是張，怨的是張，永遠永遠。
電郵：mailto:[email protected]