代表「大專2012」參加補選，出戰新東嘅學聯前秘書長周澄，係近年活躍社運界嘅新星，被視為少女版「民主女神」，佢讀愛國學校培僑中學，卻加入支聯會青年組，喺六四燭光集會上台講話，投身社運之路都幾傳奇；佢家庭背景仲令人意想不到，媽媽原來係金像編劇岸西！
從來不干涉女兒搞學運
音樂創作人林雨陽前晚主持網台節目，談到五區公投形勢時，忽然爆出岸西與周澄母女關係，指周澄幼受薰陶，所以平日睇嘅戲同書都幾冷門，因此思想獨立同好有批判性，大讚周澄「有家教」、「絕對唔係一般廿幾歲女仔，一定唔係港女！」由於周澄從無公開講自己家庭背景，因此呢個消息一出，即時引起網民哄動，連自言睇住周澄大、見住佢由中學生變大學生嘅長毛，知道周澄媽媽就係岸西後，都表現得好訝異。
岸西憑《甜蜜蜜》同《男人四十》兩奪金像獎最佳編劇，新作《月滿軒尼詩》搵埋老公做臨記扮茶客，早前宣傳新戲，只同負責繙譯英文字幕嘅大女Eugenie亮相。八方翻查資料，岸西鮮有提及自己兩個女兒，周澄更加對家庭背景隻字不提，踏遍千山萬水，僅維基百科有提及其女兒為學聯前秘書長周澄，不過冇出處。
岸西指周澄冇乜機會贏
八方噚日打電話畀岸西求證，佢坦言唔想多談家事，「但既然你問到，我冇理由唔認自己個女。」岸西話母女感情好好，只係大家生活圈子唔同，所以從來無刻意提及母女關係，「唔想人哋只係留意佢哋（兩個女）有個做編劇嘅媽媽，可能會抹煞佢哋成績，亦可能影響大家做緊嘅事，咁樣唔好。」唔使等八方問佢點睇女兒參與社運，岸西已經有答案，「又唔係作奸犯科嘅事，有乜問題？我從來都唔干涉佢做呢啲事。」周澄撐公投，面對壓力十分大，佢唔怕，但阿媽都驚驚哋，「我都知佢好大壓力，你知啦，公投好敏感。」之不過女大女世界，做阿媽都冇符，「佢應該冇乜機會贏，哈哈。」
mailto:[email protected]