何超儀投資及主演的電影《維多利亞壹號》下月公映，電影的訊息是香港樓市令人崩潰，最近有網民在Facebook成立「香港樓市玩死市民」群組，超儀一知道即在討論區發表意見痛斥地產商，懶理家族也是一分子。
由何超儀投資、彭浩翔執導的電影《維多利亞壹號》下月上畫，電影以暴力血腥為包裝，但終極要傳遞的訊息是香港樓市令人崩潰的故事。早前有網民於Facebook設立「香港樓市玩死市民」群組，超儀上周及昨日也有在討論區發表意見。
「買樓成了包袱」
超儀在那網頁寫下「為買一個單位，把大半生的積蓄、光陰、事業、夢想都押上去，值得嗎？」「中國人有一個很奇怪的傳統觀念，便是要買樓，成家立室要買樓，升職畢業要買樓，彷彿買樓便代表長大，冇磚頭揸手便過不了人世，這所謂的傳統成了一個包袱，像個緊箍咒，香港地產商正好濫用這緊箍咒，把大家越箍越緊……」
昨日超儀接受電話訪問時說：「其實彭浩翔喺07年已經寫緊呢個古仔，係金融海嘯前嘅時期，個古仔主要係想講香港樓市點樣逼到人發癲，好似我演嘅角色，就係買樓願望落空，加上周圍嘅事唔如意，最終變咗連環殺手。」
出身大富之家的超儀，家族也是地產發展商，怎會嘗過上車不成之苦，如何演活一個上車不成的OL？她說：「我係姓何啫，我都可以有自己立場啩，我身邊咁多朋友，佢哋都面對緊呢個問題，我係演戲嘅，唔通個角色要死，我真係要死過先知死亡有幾痛苦咩。」
特設學生試映
超儀又透露，電影下月正式上畫，但本月底先會在又一城舉行一場《80後大學生試映會》，她說：「係同中大新聞與傳播學院一齊合作搞嘅，當日陶傑都會嚟做主講嘉賓。」
採訪：MichelleLeung
