【倒數第7日 第29屆金像獎之新秀登場】一個金像獎新演員獎，角逐的新人包括《歲月神偷》片中的一對兄弟─李治廷和鍾紹圖。戲裏兩人手足情深，賺人熱淚；戲外講到攞獎，兄弟都冇情講。當中細佬鍾紹圖的一番話最可圈可點，他說：「嫲嫲話有個獎你哋就會嚟我哋屋企做訪問。」
撰文：何永寧
童言無忌，想說便說永遠是小孩可愛的特質，談到獲今屆電影金像獎最佳新人獎提名，《歲月神偷》演細佬羅進二、現年9歲的鍾紹圖，本應對一座既不能吃，又不會發射鐵甲飛拳的金人獎座無啥興趣，不過他奪獎的決心卻比戲中演他哥哥的李治廷還要強大，他說：「嫲嫲話一定要攞到個獎，佢話有呢個獎就會有記者嚟我哋屋企做訪問。而且徐嬌都攞過，所以我都想要，因為我覺得佢好靚。」
鍾紹圖遭同學寸扮嘢
不過鍾紹圖暗戀的對象還另有其人，就是同班的女同學，他只說：「佢讀書好叻想請佢睇戲，不過我未有飛。有啲同學仔都知我拍戲，不過就話我『扮晒嘢』。」志在必得的鍾紹圖，已經準備好上台的標準謝辭，他說：「會多謝導演哥哥（羅啟銳）同埋姐姐（張婉婷），仲會叫埋哥哥（李治廷）一齊上台。」戲中演弟弟的，對哎吔大哥又愛又恨，他說：「佢成日蝦我，不過佢死咗（戲中）掉低我，我又好唔開心。」
百厭仔捱爸爸拖鞋打
經常被人投訴百厭、頑皮，鍾紹圖半認半不認說：「都係小小百厭啫，其實我都唔係好覺，係佢哋講之嘛。」公道自在人心，演他爸爸的任達華被他激到無言以對，笑言用拖鞋打他那一場最入戲。夏萍姨更忍無可忍，兜口兜面問他為何那麼百厭，幸好沒有在片場動手。反而最有辦法的是監製張婉婷，為這隻小惡魔制訂了一本賞罰簿，以星星為獎勵，賞善罰惡才制止了他的劣行。歷盡萬水千山，他卒之集齊三萬粒星星，在慶功宴當晚從導演手上換了一支結他，他說：「因為我同導演講過好想好似哥哥咁識賽跑又會彈結他。」
李治廷拍戲學湊細佬
李治廷在戲中演早逝的哥哥羅進一，現實中他是有哥哥家姐、備受萬千寵愛的孻仔。他自言拍完《歲》片令他明白當大哥的難處，他說：「原來照顧人係好辛苦同好難，今次套戲教識我點照顧細佬，特別係進二呢啲咁活潑嘅細佬。」當然照顧還照顧，獎依然不可以讓，他說：「制度唔可以咁（讓獎），所以細佬都冇情講。獎當然想攞，最後邊個攞惟有睇天，不過到時如果咁好彩我會帶埋細佬上台，當然佢攞我都想上台啦！」
李治廷的好彩何止一次，留學回港即被黎明賞識，簽為旗下歌手；老爸跟導演羅啟銳是拔萃書院校友，30年沒見，一見面，一頓咖啡的時間，就選中他做男主角；第一部電影就在柏林參展獲獎；香港電影金像獎又獲提名。凡此種種，可能是一個演員畢生的歷程，但李治廷短短時日就達成夢想，會否擔心一切來得太快。
幸運星行紅地毯振奮
李治廷穩重地說：「好彩只係一個開始，往後自己都要繼續再做好啲。對自己又好，對報答賞識我嘅人都好，可以做嘅係努力、努力再努力。」不過柏林影展給他一個很好的體驗，他說：「一個影展原來可以咁盛大，行紅地毯嘅感覺令人個心好振奮，好有鼓舞作用，發覺幾辛苦拍套片都係值得。」雖然如此但對於音樂李治廷自言有一顆不變的心，他形容音樂相對電影是低回報高風險，創作歌手的路是孤獨，但就很享受這種冷清、荒凉的感覺，他說：「可能男仔就鍾意挑戰，越難嘅越覺得有使命感。」
電影人心水
馮德倫：細佬天份真係高
新演員是電影界的生力軍，電影工作者特別注意他們的表現，皆因今日的青澀新人，隨時可成為明日之星。
馮德倫：「《歲月神偷》兩兄弟都做得好，不過以細佬鍾紹圖嘅年紀有咁嘅表現，天份真係好高，而且同任達華同君如做對手戲都咁突出，所以我睇高佢一線。」
劉偉強：「我幾鍾意《十月圍城》嘅李宇春，佢畀我嘅感覺好似周杰倫，兩個都係唱歌出身，新人嚟講，我覺得李宇春已經交足功課，仲做得好好㖭，當然演技仲有進步空間，始終都係啱啱拍戲啫！」
雲翔：「我鍾意《淚王子》嘅朱璇，我覺得佢作為新人，喺戲入面每一部份都串連得好好，表現由頭至尾都維持穩定而且合格，我覺得朱璇好有機會。」
最佳新演員提名
閃閃童星耀影壇
童星，自有電影以來都擔當的重要角色，他們在舞台上，魅力不遜閃爍明星！香港電影金像獎自第二屆開始便設立最佳新演員獎，除了今屆的9歲童星鍾紹圖外，歷年來共有8位年紀少於13歲的小童星獲新演員獎提名，證明童星演技不容忽視。
《黃坤玄》
入圍最佳新演員時12歲
提名年份：1990年
提名電影：《阿郎的故事》
落選：輸了給《但願人長久》的江華
《林寶麟》
入圍最佳新演員時10歲
提名年份：1998年
提名電影：《對不起，多謝你》
落選：輸了給《香港製造》的李璨琛
《姚月明》
入圍最佳新演員時11歲
提名年份：2000年
提名電影：《細路祥》
落選：輸了給《喜劇之王》的張栢芝
《吳澋滔》
入圍最佳新演員時10歲
提名年份：2007年
提名電影：《父子》
奪第26屆最佳新演員及最佳男配角
《MatthewMedvedev》
入圍最佳新演員時1歲
提名年份：2007年
提名電影：《寶貝計劃》
落選：輸了給《父子》的吳澋滔
《謝芷彤》
入圍最佳新演員時4歲
提名年份：2008年
提名電影：《門徒》
落選：輸了給《跟蹤》的徐子珊
《文俊輝》
入圍最佳新演員時11歲
提名年份：2008年
提名電影：《野．良犬》
落選：輸了給《跟蹤》的徐子珊
《徐嬌》
入圍最佳新演員時12歲
提名年份：2009年
提名電影：《長江7號》
奪28屆最佳新演員獎
資料來源：《蘋果》資料室