美國前總統小布殊上星期五由上海返美國途中，旋風式訪港六粒鐘，去咗尖沙嘴出晒名受老外歡迎嘅裁縫店Sam'sTailor做西裝，又同家族世交香港前特首董建華見面，唔知兩人有冇傾到近期成為中美關係焦點嘅人民幣滙率問題呢？
好多外國政要都係Sam'sTailor客仔，包括英國前首相貝理雅、美國前總統克林頓、老布殊等等。印度裔老闆Sam已經收咗山好耐，裁縫店家由佢個仔ManuMelwani打理。Melwani話，小布殊係老顧客，但親自嚟度身做衫都係第一次，「佢好友善，睇落好健康，一口氣訂咗18套西裝。」Sam'sTailor一共有50個裁縫，即使今個星期要起貨，Melwani都有信心如期將西裝寄去美國。