有留意中國新聞嘅讀者，都識艾未未。佢除咗係詩人艾青之子、中國當代藝術家之外，近年仲為內地好多社會事件發聲，甚至透過實際行動挑戰當局，好似收集5.12汶川大地震死難學生名單、聲援譚作人搞到被公安打、上長安街抗議藝術區拆遷等等。近日，佢嚟咗香港，仲約咗班80後香港網友今晚食飯。
唔係80後要自己畀錢
艾未未係twitter超級用家，一日用成八粒鐘，有成32,423人跟佢（即係做follower睇住佢發佈嘅訊息）；上個月twitter創始人JackDorsey同佢公開對談，艾未未仲問對方twitter幾時搞中文版。上星期三艾未未透過twitter向大家報告：「在去香港的路上，去另一『制』很不習慣。」翌日又話香港係「一個有文明秩序的地方」。
twitter非官方中文名叫推特，twitter上嘅網友就係「推友」，班「推友」暱稱艾未未做艾神或「愛神」（艾、愛嘅普通話同音）。香港推友見「愛神」難得來港，即時透過推特約佢飯局，艾未未亦好爽快，應承咗請香港班80後推友今晚見面食飯，仲話唔係80後嘅都可以嚟，但要自己畀錢。八方噚日喺電話度同愛神傾咗兩嘴，佢話以前都嚟過香港，但今次行程特別緊湊。
今午藝術中心搞講座
原來下個月佢將會同美國藝術家VitoAcconci喺香港合作搞展覽，佢哋兩個都係積極參與社會運動嘅藝術家，今日晏晝會喺灣仔藝術中心先嚟個講座，同香港觀眾見吓面交流吓，聽講訂座早已爆滿。聽日艾未未又會入中文大學，參加一個座談會。
艾神喺西方藝壇好吃得開，早排先被英國《藝術評論》選為年度當代藝術最具影響力一百大人物；時裝品牌CommedesGarcons都出咗件印有佢嗰個西瓜作品圖案嘅Tee，香港都有得賣。
mailto:[email protected]