王祖藍、阮兆祥、李思捷同埋阿姐汪明荃前晚喺將軍澳電視廣播城錄影《荃加福祿壽》，繼續發放笑彈，扮女人出色嘅王祖藍今次模仿台灣巨乳瑤瑤，唱《愛的抱抱》，啲神態鬼咁嬌嗲，造型又夠爆，一出場觀眾笑到收唔到聲。
節目開始前大家同李思捷切蛋糕慶祝生日，王祖藍想話走去阿姐身邊擁抱一下，點知阿姐可能怕鬼咗佢唔男唔女，直接拒絕話：「見到你都飽呀！」仲一手拍落王祖藍個假巨胸度，原來除咗阿姐被嚇飽外，王祖藍都嚇窒唔少女仔，佢話：「真係飽晒啦！做呢個節目將所有想追求嘅女仔都趕走晒，邊有人鍾意扮女人嘅男人o架，隻腳仲幼過女仔，家出街人人叫我索女。」
至於扮嘢見稱嘅李思捷點會畀祖藍專美，佢扮大隻郭富城唱歌跳舞，不過佢身上嘅肌肉衫就假啲，但佢嘅唱腔就真係幾可亂真，加埋刻意扮嘅表情，相當搞笑。
杏兒唔怕被玩
胡杏兒前晚做嘉賓挑戰扮梅艷芳載歌載舞，佢仲為咗上呢個節目瞓唔着，節目內容經常會將緋聞男女新聞拎嚟開玩笑，胡杏兒同黃宗澤都係公認嘅一對，杏兒話：「如果真係扮都唔介意，有人扮即係有代表性。」
