同一隻Game兩個平台分別有兩個不同主角，由SQUAREENIX製作嘅《NieR》都算大突破！以日系機迷為目標玩家嘅PS3版，主角NieR係年輕美型瘦削男；而以西人為Target嘅XB360，主角就係肌肉型中年猛男。如果你係女主角，你會揀邊個救你？我會揀個有車有樓有經濟基礎o架囉，唔係救咗我都無前途啦！
文：阿洛
兩個版本 同一世界觀
其實係諗多咗！呢隻由《Drag-onDragon》團隊開發嘅動作RPG，故事發生喺末世，救嗰個亦都唔係男主角、女朋友，而係親人。連個Game名都唔同，PS3版叫《NieRReplicant》，而XB360版就叫《NieRGestalt》，前者係救個有絕症嘅妹，後者就係救個病緊嘅女。雖然連個名都唔同，但同伴以及遇到嘅敵人或者世界觀都係一樣。講到尾，PS3玩家就着數啲，因為美版PS3遊戲，會同XB360版人物、內容設定一樣，唔使健身都可以變大隻佬。
讀多啲書無得輸
遊戲中有極多巨型頭目魔物登場，極有逼力，最啱好此道者；不過呢啲頭目好棘手，要專門對付佢哋嘅弱點先可以過關。
咁點先可以知道敵人弱點呢？就係靠一本叫「白之書」的東西！佢會提示點樣打魔怪先最有效，同時佢仲可以幫手出輔助魔法；而且在戰鬥時，另一特別之處係當巨大波士受到一定傷害後，特定部份就會出現兩個鐘，一個計時間，一個會隨住攻擊命中而減少能量，要喺時限之內扣晒嗰度嘅能源，就可以破壞嗰個部份喇。
小遊戲強化刀劍槍
遊戲入面主角主要用三種類嘅武器，分別係連技最強、單手用嘅劍；以力量取勝、雙手用嘅刀；同埋以長距離攻擊為主旨嘅槍。每樣武器都可以有4階段強化，而強化就要有必要嘅素材同金錢，除嗰殺怪物可以拎到外，遊戲中都有好多小遊戲，例如種瓜、種菜或者釣魚，改造後嘅武器除攻擊力、魔法力同外形都會有變化，但同時都會出現因重量增加而減卻能力嘅情況出現。
遊戲名稱：《NieRGestalt》/《NieRReplicant》
平台：XB360/PS3
人數：1人
製作廠商：SQUAREENIX
類型：動作RPG
推出日期：4月22日
