香港金像獎特刊拍攝完成，除咗之前男、女主角封面曝光外，有份競逐最佳新演員嘅五位新人都有份影特刊，佢哋係陳法拉、朱璇、李宇春、李治廷同鍾紹圖，相中佢哋五人一齊手蹺手平排影相，似是象徵一同競爭，但陳法拉以最鮮明姿態企喺中間位，而且衣着都較其他新演員突出，其實今年影圈新人個個叮噹馬頭，競爭都應該幾激烈。