高官下令活化工廈，唔少業主拍爛手掌叫好，認為係利民德政，不過租用工廈嘅藝術家、話劇團等文化界人士卻叫苦連天，事關未享受到工廈活化嘅好處，加租、逼遷已經殺到埋身，民協都係另類受害人。
租金倍升
民協近年搞社企頗為成功，幾個月前搵到拍檔投資，打算開咖啡店進軍飲食業，為基層市民創造就業機會，不過事隔幾個月，社企咖啡店都未成事，民協馮檢基同八方大吐苦過齋啡走甜苦水，基哥話做過初步研究，發現喺工廠區開咖啡店競爭冇咁大，所以農曆年前已去觀塘、荔枝角等地搵舖位，「我喺觀塘工業區逐條街行，行咗兩次。」
行到腳軟，物色到啱心水舖位，唔夠1,000呎月租16,000元左右，諗住計清楚條數，確定成本先扑槌，點知過年後租金幾乎倍升，「成三萬蚊一個月租，真係好難做。」佢再去其他工廠區睇，發現租金都直線上升，社企咖啡店開張無期。工廠活化有望，佢間舖卻隨時胎死腹中。