西九文化區管理局行政總裁（CEO）千挑萬選，由英國人謝卓飛（GrahamSheffield）跑出。多數香港人對佢好陌生，唔多知呢位仁兄憑乜嘢過人之處，獲西九董事局主席唐唐青睞。佢接受西九每月通訊訪問，披露身世，仲大爆同唐唐有共同嗜好。
謝卓飛媽媽係黎巴嫩、法國混血兒，祖父母住在開羅做高級珠寶生意，所以家族同阿拉伯文化有深厚淵源。擁有八級鋼琴資格嘅佢，人生閱歷豐富，曾為英國廣播公司製作一個雪崩節目特輯，探索阿爾卑斯山雪崩嘅恐怖經歷，點知真係遇上意外，被掩埋喺雪洞內，幾乎葬身雪嶺，好彩最後憑一條發臭香腸同一支咪，先俾搜救犬搵到佢。
謝卓飛話自己好鍾意煮嘢食，不時煮幾味撚手小菜宴客，而且偏好食辣。所謂美酒佳餚，佢同冇紅酒不歡嘅唐唐一樣，冇紅酒不歡，乜嘢國家嘅葡萄酒都好，正所謂得西九，飲紅酒，今次真係飲得杯落啦。