菠蘿油堪稱香港特色美食之一，飲食網站Openrice同牛油公司舉辦菠蘿油之王公投，市民一人一票選出菠蘿油王，噚日請咗兩間馳名茶餐廳代表講解整菠蘿油秘訣。
要用鮮牛油
喺太子屹立幾十年嘅金華冰廳老闆娘陳太話，整菠蘿包嘅麪粉一定要用靚貨，蛋、奶同糖要人手調控份量，「大集團個麪粉底買返嚟已經有晒蛋、奶同糖，唔係自己溝點都爭啲。」至於菠蘿油嘅靈魂，即係塊牛油，佢堅持用鮮牛油，人造牛油唔入流，入口即知，「冇咗陣香味。」
康年餐廳嘅代表李師傅指整菠蘿包竅妙係搓好麪粉後，要放半個鐘「唞氣」，搓完再「攤」廿分鐘，切開一嚿嚿麪糰後又再「攤」一陣，等個幾鐘後加塊皮先入焗爐，爐溫要夠高先可以令皮脆，塊牛油則要喺雪櫃攞出嚟後即夾入包，「牛油喺口中融化個口感最好。」
幾蚊一個菠蘿油原來咁講究，想公投唔使等到5月16日，今個月16日就可上Openrice投票，喺近200間餐廳中選出最正菠蘿油，仲可以選埋最正西多士。