早排香港郵政以福建土樓做主題出咗一系列郵票小型張、首日封等，其中最吸引小妹嘅係嗰張俗稱「四菜一湯」、由五座土樓組成嘅田螺坑土樓群，前年被列入聯合國世界遺產。
廈門三小時車到南靖
講到咁勁，小妹上網摷資料，原來田螺坑土樓群座落南靖山區，好分散，交通唔係咁方便，要坐飛機到廈門，再坐成三個鐘先到南靖。內地有個旅遊網站攜程旅行網（ http://www.ctrip.com/），有南靖土樓一日遊，人民幣每人350蚊，行程包括田螺坑土樓、有福建土樓之母稱嘅裕昌樓、建喺沼澤上嘅和貴樓、建築最精美嘅雙環圓土樓懷遠樓等，仲包埋午餐同門票。
不過小妹慣咗自己玩，唔想跟幾十人嘅大陸團好似趕鴨仔咁，決定包車遊土樓，喺網上討論區見到一個叫小柯嘅司機口碑唔錯，send個email（mailto:[email protected]）問價，包車一日收800蚊，門票及午膳另計。小妹同老媽一行三人去，平均每人270蚊，即刻扑槌。
小柯揸車到廈門酒店接小妹，佢好後生，南靖人，好鬼熟路，行程跟大團反其道而行，避開人群，值得加分；佢做埋導遊同揸機佬，仲帶埋小妹登堂入室參觀。玩晒全日土樓入場費每人唔使200蚊，老媽70歲免收；食飯100蚊全家食到飽。佢溫馨提示話，如果下次唔急，可以喺塔下村土樓住一晚，附有獨立衞生間嘅房都係百零蚊一晚。收到！
電郵：mailto:[email protected]