新盤變成抽水機，大圍名城一周便抽了市場70億資金，加埋其他新盤加快賣樓，變成搶錢復活節，起碼賣去了100億貨。接下去二手市場少了批客，高位新客又縮沙，第二季樓市會相當缺水。
首季由二手樓先行，老樓曾建議入市的大型屋苑起碼升了一成，升得太急有點不自然，去年全年升了27巴仙，2010年頭3個月已經連新界區二線樓也如坐直升機，快到追唔切，市場資金多到不得了，幾多都要得起。由元朗YOHOMidtown起，累售1200伙後，名城又賣了逾700件貨，每個單位由800萬至1000多萬元，而且不但內地客掃貨，連本地買家和投資者也按捺不住，邊鬧樓價貴，但也不敵樓市好氣氛加入買樓行列。
趁好市套現謀後路
之不過，一眾發展商不斷出貨，趁好市套現或有後路。一方面儲定子彈等入地，主因銀行融資不知何時收緊，求人不如求己，做好投地資金準備，同人家鬥大。之前新地賣YOHOMidtown後，高價買入將軍澳地皮，又以呎價2700餘元替毗鄰三期項目補地價，似乎為未來樓市若調整，可先鎖定利潤，把資源投放焦點項目，貨如輪轉、生意興隆。
學發展商鎖定利潤
一手搶了二手客源，資金被凍結，樓市短期交投量有放緩迹象，四大屋苑中炒味濃的沙田第一城交投量已大減，天水圍嘉湖山莊呎價亦升近每呎2600元，投資者開始靜雞雞減持貨量，市民高位接棒風險高。
今年工資雖然有加幅，但按預期加幅勢必追不上樓價升幅，買家負擔無早兩年咁輕鬆，年前低價買入應該學發展商先鎖定利潤，套現後等時機再換貨，錢落入袋先最安全。至於高位入貨的買家，若非自住，趁租金回升之際及早租出，可分擔按揭供款負擔，提早有心理準備加強防守能力。
劉兆昌
http://www.HKLau.com