周五2/4
米禾爾斷我經脈
長假對部份傳媒人如我，意義唔大，有得揀我梗係想飲餐茶都唔使同人逼啦；今晚啲波戲碼平淡，但英國波我在行喎，嘩！起勢過到關，點知米禾爾守尾門，開1:1，經脈幾盡斷。
閒贏指數：☆☆
周六3/4
《蘋果》體育組最威
看到本報超級威水版，今天假期相信波友笑到盡！牽牛貼車仔贏曼聯2:1波膽中正最巴閉；至尊推介無論客席或體育組名家全中，當然包括愛隊鯨魚[-1]。未收夠籌嘅波友，深夜波勁開上盤包括巴塞炒畢爾包，呢個假期彈藥充足咯。
閒贏指數：☆☆☆☆☆
周日4/4
荷蘭波「細」風日下
興奮過後歸於平淡，我從來唔信乘勝追擊，即係你過大海玩大細，點都要過到三口、玩百家樂係要冧多口莊，濠賭股搵到食，都係拜好多人唔洗袋都唔肯離場咋。今日一開荷蘭波已覺唔對路，場場開「細」，縮注也要損手。
閒贏指數：☆
周一5/4
強項英冠搵到食
復活節假冇英超賭又要返工，咪做吓功課，攻我強項英冠英甲。有賠率我唔反對大家追波，列斯聯同米禾爾爭升班心切，呢鋪齊反底兼單W都有肉食；中間場捉住旺門黑池又得手。到尾段開波前，好友收晒錢仲短訊問我尾場有冇好嘢，哈哈！紐記「和局」過卡城「客勝」，得咗！
閒贏指數：☆☆☆☆
周二6/4
怨氣多注定失敗
明知兵工廠輸硬，都要出去睇再用錢支持；好友提醒，不如夾份買「首球」。我冇揀賓仔，但老友心水清，11倍都要支持吓，唔使輸光都要被大炒，但心服！更服，梗係Eason，睇尾場佢最後着住人字拖唱到凌晨12點50分，我仲握到手，開心到震；佢個愛女也撐場，睇到尾段眼瞓扭計喊，Eason冷冷說：「眼瞓咪走先咯！」要養妻活兒又要勇闖事業高峯當然唔容易，但香港周街都係怨氣多多、自視過高嘅失敗者。
閒贏指數：☆☆☆☆
周三7/4
踢波冇話無敵嘅
二揀一，今晚留喺屋企回氣睇紅魔鬥拜仁，其實兩晚都好精采但唔好賭，故都係小注怡情，博拜仁[+1]失手，但佢哋咁都晉到級！一山還有一山高，足球永遠好多「驚喜」，冇無敵定係輸硬，勝與負也唔使黑面，睇得開心咪得咯。
閒贏指數：☆☆☆☆
周四8/4
歐霸禾堡太屎
歐霸盃仲夜過歐聯開波，唔睇咯，德國隊當旺捧雙堡，哎喲，點解禾堡咁屎o架！
閒贏指數：☆☆☆
值得跟進球隊：米禾爾、列斯聯（英甲強隊為直升發狂）