政府想振興香港足運，可惜足總唔爭氣，糊塗賬搞得唔清唔楚，令人擔心公帑揼落鹹水海，好多人對所謂「鳳凰計劃」改革方案不樂觀，好多球迷可能對本地足運好有意見，香港體育關注組約咗足總主席梁孔德一齊「講波」，係足總主席破天荒落區直接面對球迷。對香港球壇好有意見，想搵人出氣，或者自認有好橋搞起香港波者，可以直接同梁孔德傾傾。
呢個「講波」大會聽日下午3時至5時喺軒尼詩道365號富德樓9字樓舉行，搞手Edmund話唔理捧邊一隊波，歡迎各界人士參加，不過當日下午有場本地波大埔戰南華，相信唔少球迷會入大埔，去睇波定「講波」，球迷今次真係腦交戰。