做咗阿仙奴球迷起碼十幾年，近年更加培養阿Q精神，比起曼車迷，佢哋講爭標，做幾多冠王，不過剛剛歐聯出埋局，好大機會連續5季四大皆空，阿仙奴換嚟嘅評語，最多就係娛樂性豐富，同雖敗猶榮。
兵工廠呢幾年都有唔少經典雖敗猶榮之作，07年英聯盃，面對「夫添」嘅車路士，一度領先一球，最後被杜奧巴梅開二度反勝。剛剛歐聯8強，賓特拿嘅入球興奮咗3分鐘，最後俾美斯搞掂。輸俾由世界最佳球員領軍嘅球隊，雲格嘅心聲，就同小弟一樣無奈。
阿仙奴今周末冇波，總算可以休息吓，另一支倫敦球隊韋斯咸，評價一樣娛樂性豐富；周六主場對新特蘭，支持佢攞護級救命3分。
牽牛
主客和：韋斯咸勝
心得：韋咸開始轉勢
近5場往績：WLWWL