在網絡年代全民起義，要有新世紀動員手法。政府冷待補選，慌死公投有高投票率，激發小市民製作動畫撐公投。網名「小孩子」嘅動漫愛好者將風靡一時嘅日本動畫《新世紀福音戰士》（簡稱EVA）改成《新世紀五區公投戰士》，五個戰士合力對付奸角「使徒」煲呔，力抗DAB力場，動畫呼籲市民投票畀力量五個戰士，一舉打爆怪獸。
公、社兩黨五個候選人變身《EVA》幾個主角，長毛設定為真嗣，陳淑莊化身宅男女神綾波麗，陳偉業反串女角變成明日香，梁家傑則係副司令冬月，指揮大局嘅碇司令非毓民莫屬。睇過條片嘅網民普遍好評，御宅族好有親切感，尤其係陳偉業竟然係明日香，真係出人意表。
「小孩子」本身做美術工作，所以畫幾格圖畫難唔倒佢，佢話最可惜係畫得幾個主角唔夠像真，效果未夠完美，加上首次用剪接軟件，比較生手，「初時以為兩日做好，結果搞足四日先得。」佢強調呢條片唔係個人功勞，仲有個幕後功臣協力，不過唔想開名，叫佢「義士」就得。
望檢討不公義制度
八方以為用動畫宣傳公投，應該係80後，甚至90後傑作，原來「小孩子」係60後，笑言自己唔係電車男，而係電車佬，「特首好鼓勵創意工業，我只係發揮少少創意，響應佢嘅講法。」「小孩子」並非公、社兩黨成員，平日冇參加遊行、抗議等政治活動，出手幫忙宣傳公投，佢話要多謝一眾高官，「我本來唔識政治，係呢個政府教曉我。」
佢同八方講，覺得家政制不能解決社會不公義問題，一意孤行興建高鐵係漠視民意經典，「港鐵話做過全港諮詢，原來只係去過區議會，小市民根本冇得畀意見，正一假諮詢。」因此佢自發改畫《EVA》鼓勵選民5.16投票，「我唔係針對某啲人，只係希望靠建制外嘅力量，促使政府檢討吓呢個不公義制度。」呢個網址可睇片 http://www.youtube.com/user/kwailau2#p/a/u/0/NzyC3b-RizM
mailto:[email protected]
