放完長假之後，碟場仍然無乜生氣，連買碟揀碟嘅人都無乜，喺呢個冷檔期就只有一套女權分子最愛嘅《艾美麗雅：伴妳啟航》，在無對手下順利跑出，想煲碟就惟有揀佢！片中主角追求男女平等，為自由高飛，幾乎放棄一切，又的確非一般人能夠學到，但可惜最後非如人願……都係留俾大家自己去睇。
記者：許福合
部份攝影：許福合、楊錦文
真人真事改編
電影故事由真人真事改編，片中將電影與歷史影片穿插，睇落既有睇緊電影嘅緊湊，又有重溫歷史名人傳記嘅感覺，而且製作班底相當有卡士，曾榮獲最佳外語片大獎暨康城影展得主大導演美拉娜兒掌舵，兩屆金像影后希拉莉詩韻飾演女主角，加上型男影帝李察基爾，幕前同幕後都係星級人馬！
主角嘅艾美麗雅係一個飛行傳奇，夢想成為女性飛行員嘅先驅，早於1928年就成為首位飛越大西洋嘅女飛行員，瞬即成為明星級人物，接拍廣告，名利雙收，而且因為敢言嘅作風，身邊更有丈夫兼經理人佐治（李察基爾飾），與情人知己基尼（伊雲麥葵格）陪伴。雖然係咁，艾美麗雅並唔滿足於平淡嘅生活，誓要不斷挑戰自我，追求飛行極限，最後當要飛越全球時，失蹤下落不明，當年係相當震撼嘅懸案之一。
劇情淡淡
始終係傳記式電影，歷史上有根有據，導演處理電影內容時顯得十分謹慎，在表達艾美麗雅由平凡女孩，升呢成明星級女子飛行員時，個人覺得表達手法太注重表面，更多見到主角們穿梭於政商界，初期萌芽航空業亦無特別深入開發，雖然艾美麗雅丈夫及情人並存，不過劇中亦只係輕輕觸碰，並無深入描寫，在片中前半劇情中，基本只提到艾美麗雅嘅成功，但對觀眾來講，就太過平淡了！反而原本只用作配襯嘅HilarySwank，突出咗當時女性主義抬頭嘅角色，個性突出，睇落更有印象。
尾段出奇緊張
原來平平淡淡嘅劇情，當進入尾段，艾美麗雅要展開最後嘅環球飛行時，作為觀眾會突然覺得緊張起來。旅程起初無遇上阻礙，但當回程時竟然因為無線電出問題，而接收站亦因為人為意外，雙方一直未能聯絡上，睇住他們一直在無線電呼叫對方，但總沒回應，真係睇得非常肉緊，而最可惜係最後飛機燃油有限，又未能聯絡上之後，最終艾美麗雅都未能完成旅程，無法見到丈夫最後一面。
值得一提係Bonus內容出奇地豐富，有多組刪剪片可以睇到，甚至有部份劇情，覺得正場交代得唔多清楚，睇完Bonus就會知道，原來係咁！而最後更睇埋用唔晒嘅環球飛行片段，呢段影片效果好正，必定要睇！
