假的真不了果然係至理名言，噚日內地報道話導演彭浩翔嘅下一部電影已經搵咗替李澤楷誕下囝囝嘅梁洛施友情客串，仲講明係做一個大肚婆。
盧覓雪斥荒謬
報道又引述彭浩翔話梁洛施目前嘅身價起碼值200萬喎，講到真嘅一樣，不過噚日彭浩翔透過電話話絕無其事，佢話：「完全冇接受過呢個訪問，又冇講過會咁做，所以件事都好離奇。」彭浩翔話都係噚日有朋友傳真咗份報道畀佢，佢先知呢件事，佢話：「就算真係要搵梁洛施合作都要戲啱，同埋我諗冇嘢緊要得過一個媽媽湊仔，所以短期內都唔會。」
報道又講到彭浩翔嗰套喺香港上映緊、被評為三級嘅電影《志明與春嬌》喺內地應該上唔到，彭浩翔話自己唔係負責發行，所以唔清楚，但就覺得套片喺香港三級係因為粗口，內地上映會配番普通話，問題應該唔大。
另外，對於梁洛施復出嘅報道，佢嘅發言人盧覓雪就話：「荒謬之談，冇咁嘅事，暫時冇工作安排。」