出道以嚟一直俾人話係花瓶嘅台灣第一名模林志玲，近日似乎要話畀人聽自己除咗有樣貌，有身材之外，其實都有演技。佢喺同日本紅星木村拓哉合作嘅日劇《月之戀人》中，已經要唔着鞋通街走，今趟喺電影《決戰剎馬鎮》入面更變本加厲，以一名「菜刀女」形象示人。
向孫紅雷偷師
呢個造型一出，就俾網友懷疑係吳尊或者周渝民嘅男扮女裝。今次志玲仲收起佢一向用嚟取勝嘅咪咪，取而代之係下垂嘅胸部、走樣身材同一口黃牙，根本令人聯想唔到佢就係《赤壁》入面凄惋動人嘅小喬。能夠打動志玲放下身段，相信當中一個原因就係可以同好戲之人孫紅雷合作，藉以洗脫花瓶嘅惡名。
志玲喺《決戰剎馬鎮》中飾演潑辣老闆娘，經常對孫紅雷拳打腳踢，演嚟都入木三分。其實志玲今次嘅決心可以理解，之前佢同周杰倫合作嘅《刺陵》，令佢唔識做戲嘅形象深入民心，所以今次佢一有空檔就捉住孫紅雷嚟排戲，務求喺呢位好戲之人身上偷師。
志玲咁緊張，除咗因為要洗底外，另一原因係呢套戲安排喺暑假上映，同期嘅勁敵就有馮小剛嘅《唐山大地震》。