近期創業板股炒到飛起，繼周三北亞策略（8080）單日喪升近60%之後，噚日再有多隻創板股上咗升幅榜，其中環球集團（8192）及杏林醫療信息（8130）股價分別升16%及13%，不過純睇升幅未必感受到市場炒賣氣氛，皆因前者市值超過20億元，但成交額僅2400萬元，而後者市值僅7億銀，單日成交額卻已達到1.17億元，即係話有7分之1嘅貨成交咗，扣除大股東持貨，唔知突然間點解有咁多貨在市場交易。
似部署食大茶飯
平日名不見經傳的創板股仔突然成交大增，近期例子之一是中國掌付（8047），3月中突然成交激增之後，股價便一路炒上，由起步位0.15元一直炒上昨曾見0.42元，升幅以倍計，非常誇張。欲捕捉這類倍升創板股仔，若要從基本因素分析，好難得出結論，反而睇成交會見到資金口味，從此方向睇，杏林或部署炒上食大茶飯。
杏林從事醫療系統電子訊息業務，專門為內地醫院進行數碼化，去年12月大舉配售50億股新股，每股0.10元，即大額集資5億元，並由外資大行里昂包銷，不過新股一出股價即時狂跌，幾日時間股價最低見6仙，相當恐怖。
等咗幾個月，杏林昨日股價終於升至0.101元，重上配售價，但現價仍是上市以來低位，去年平均交易價都在0.25元以上。睇成交炒股，杏林應該有一定值博率，參考北亞策略升幅，杏林可供想像空間可能更大。
歐陽風