【本報訊】起來！不願做奴隸的人們，起義的時候已到。代表工人、長者、婦女、大專生、宗教界等27個民間團體集結起來，啟動「民間一人一票踢走功能組別運動」，5月9日在立法會外舉行動員大會，呼籲全港巿民參與5月16日變相公投，以手中選票，向功能組別說不。記者：張嘉雯
來自27個民間團體的代表昨日啟動「民間一人一票踢走功能組別運動」，要求取消功能組別，落實2012年雙普選，全力推動巿民在5月16日立法會五區補選投票。運動成員將透過講座、單張，向巿民解釋踢走功能組別的重要性，即使5月16日過後，教育工作仍會繼續。
下月9日搞動員大會
婦女參政網絡主席劉家儀指，運動與政黨沒有任何關係，「我哋唔係叫巿民去投邊個，巿民識得自己去選擇，識得睇候選人對功能組別嘅立場、認為幾時應該雙普選而去投票，我哋唔係要幫任何政黨做宣傳，只係希望候選人聽民間意見。」劉家儀表示，5月9日的動員大會歡迎任何候選人出席參與討論。
對於有巿民認為變相公投浪費公帑，劉家儀指選票「物有所值」，「嘥錢？呢個係公民權利嚟，攞600幾億起高鐵仲嘥錢呀，家平均每人每票只係廿幾蚊，廿幾蚊可以表達自己嘅意願真係好抵。」不少西方國家都有公投制度，根據其中一個參與團體、民主通識教育組的研究，外國每次公投每張選票的花費約20至40港元，今次變相公投不能說是浪費。
立會變老闆俱樂部
職工盟代表譚駿賢批評，工商界一人兩票、甚至多票，令貧富懸殊加劇，功能組別加上分組點票制度，令立法會變成「老闆俱樂部」，「佢哋只會以老闆嘅利益出發，我哋勞工嘅權益就更加冇人理。」
為性工作者服務的紫藤代表直指，功能組別冇人代表性工作者權益，「其他人都話去搵立法會議員，佢哋唔肯幫，功能組別直情冇人代表姐姐仔，連擺個議題上去都冇辦法，所以我哋覺得要一人一票直選，唔要功能組別。」
民主通識教育組批評，政府胡言亂語，試圖扭曲普選定義，混淆視聽，特別製作了三份教材，介紹公投、民主等概念，供巿民下載。
（網址為 http://sites.google.com/site/democracyliberalstudies）
數功能組別議員「偉績」
【本報訊】借問筍工何處有？功能組別特別多。立法會議員公帑支薪，功能組別的醜惡赤裸裸──零票當選、零出席率、到期自動續約、少數否決多數；立法會植物人多年來以「存在」侮辱巿民，看不過眼的大專生，製作功能組別議員履歷，羅列議員所獲票數、提出動議及修訂次數和投票取向，讓老闆看清這群高薪職員的真面目。
「喚醒沉淪的大學生」
金融界議員李國寶自85年功能組別成立以來，幾乎每次都是自動當選；08至09年度從未在大會提出動議及修訂，只發言六次，多次投票時缺席；同樣自動當選、鄉議局的劉皇發，去年從未提出動議及修訂，出席率僅七成。以上種種「豐功偉績」，只要一讀民間議員履歷表就知道。
製作這批資料的大專撐公投聯盟，成員來自七所大專院校，負責人阿彭認為，這一代大專生脫離社會責任已久，今次行動是希望「喚醒沉淪的大學生」，製作大字報、集體電郵、宣傳刊物，吸引同學關注，又會設計各種裝置藝術，「貼喺民主牆，大學生見到都覺得幾興奮幾得意，佢哋一直以為功能組別好專業，但原來唔係，係佢哋一廂情願嘅諗法嚟，當佢哋知道議員嘅政綱同佢哋所做嘅完全不符，又反對好多有利民生、有利民主嘅嘢，佢哋都好憤怒。」