一個係廣結上等人的奇女子，一個是草根政黨話事人，竟會在屋邨酒樓論政，可能係香港政壇史上最香艷嘅一次龍門陣。
呢次經典飯局女主角係狄娜，男主角係民協馮檢基。阿基噚日同八方講，六四後一、兩年，民協決定同北京恢復接觸，為評估時局，每月會約各界人士同黨內區議員飯局論政。大約93年或94年，有人提議邀請狄娜，因為佢做Chinatrade，而且係敏感嘅航天工業，好熟悉國情，講嘢應該有料到。
有談及六四事件
阿基話狄娜一口應承，仲願意紆尊降貴到石硤尾邨酒樓，佢指狄娜十分隨和，而且政見在當時商界人物中算十分開明，「佢認為身為中國人，應該幫助國家進步，不過都同意中國好多方面要改善，包括政治、人權，係未上軌道。」
自稱為中共做間諜嘅狄娜，飯局中亦有談及六四事件，「佢唔同意殺人，但又覺得喺當時情況，政府要收拾局面，（開槍）係迫不得已。」阿基話記憶中，狄娜當時忠告，同北京交手溝通時要堅持原則。民協奠下「又傾又砌」路線，睇嚟狄娜都應記一功。