家去旅行有啲膽戰心驚，四圍都打到七彩，近嘅有泰國曼谷局勢越嚟越惡劣，遠嘅俄羅斯莫斯科有自殺式炸彈恐怖襲擊。保安局忙於發放又黃又紅嘅外遊警示，暫時未有黑色警示。跟團如果旅行社取消行程，團友蝕少少手續費都可以攞番團費，自遊行最慘，唔去假期泡湯兼蝕水，決定去又要冒險。想買旅遊保險坊間又唔多紅、黑警示都保嘅旅遊保險。
5天行程保費198元
旅行社縱橫遊嘅公關姐姐Kimmi噚日打畀小妹話，佢哋同ACE保險公司合作推咗個叫做「縱橫旅安心」旅保，黃、紅、黑旅遊警示全部都保，保費又冇加，好似5天行程保費都係198蚊，去內地就95蚊。跟佢哋嘅旅行團或幫趁佢哋機票加酒店套餐嘅旅客都可以買。保障範圍包括醫療費用、個人意外、緊急醫療運送及運返、個人財物及金錢、旅程延誤及行李延誤。旅客喺唔能夠控制嘅情況下未能依照原定計劃返港，有關受保期會自動延長至最長10日。Kimmi強調，受保期間保安局突對旅程目的地發出黑色警示，都有得賠，好似受保旅客被迫縮短行程，保險公司會按比例賠番該旅程仍未使用嘅天數嘅旅程費用等，或受保人額外旅遊費用或膳食費用等。
Kimmi又提醒，旅客一定要在旅行前7天購買有關的旅遊保險，同埋購買一天之後，要去嘅地方發出黑色警示而取消行程，旅客就可以賠番團費或機票加酒店嘅費用。
電郵：mailto:[email protected]