新產品iPad出爐，蘋果Fans三倍價錢買入都話抵，想當年iPhone一出又係有讚有彈，不過今日朋友圍埋有七成都用緊！就連英國名廚JamieOliver特別設計iPhoneApps，推出全新20分鐘搞掂食譜，等潮人Annie試做Apps內食譜，睇睇是否Easy又方便！
記者︰黃家欣
攝影︰譚盈傑
真人發聲20分鐘食譜
由JamieOliver主理的食譜Apps「20minutesmeals」，共花六個月時間製作，去年底推出，下載費用為美元$7.99，旋即成為最高下載率的iPhoneApps，全因用法簡易，條理又清晰，當然仲有靚仔廚神不時Update食譜啦，款款20分鐘完成，啱晒繁忙的城市人！
一開啟程式即有Jamie親自歡迎，Fans見到最開心，然後見到食譜分門別類，有主菜、意粉及甜品等選擇，一目了然。
①挑選心水食譜後，即可見到完成品的圖片。
②一按「you'llneed」，所有材料及用具清晰地羅列，加入ShoppingList，更可列出一張超市購物清單，唔怕買漏材料，好方便！
③再按「step」即出現做法，每個步驟分野仔細，圖文並茂，邊睇邊做煮起來更易上手。如有特別貼士，更有Jamie原聲提醒，好窩心！
挑戰者Annie
這個Apps相當好用，圖文並茂，步驟仔細又清楚，仲有好多JamieOliver教煮餸的小貼士短片，下載落手機後，可以不停溫習，唔識睇到識！
香腸小胡瓜卡邦拿
Sausage&CourgetteCarbonara
00hr20min
製作難度：★★★☆☆
份量：2人
材料
意大利肉腸3條、煙肉2條、意粉250克、蛋黃2隻、忌廉100毫升、小胡瓜1條、巴馬臣芝士50克、檸檬1個、番荽1棵（切碎）、橄欖油適量、鹽/胡椒粉各少許
做法
1. 焗爐預熱至100℃，將碟放入焗爐保溫。
2. 煮滾適量水加少許鹽，放入意粉不時攪拌，煮至爽彈後盛起瀝乾水。
3. 小胡瓜切粒；煙肉切絲；肉腸去衣後將肉搓成肉丸。
4. 燒熱鑊加少許橄欖油，轉中火放入肉丸煎6分鐘至金黃，加煙肉及小胡瓜，煎至煙肉金黃香脆後熄火。
5. 將檸檬刨皮，榨出檸檬汁拌勻，再加蛋黃及忌廉拌勻至軟滑，然後加番荽碎，放入一半份量的芝士拌勻。
6. 將意粉放入（5）拌勻後放入平底鑊，加肉丸及煙肉拌勻，撒上鹽及胡椒調味煮勻，放上已預熱的碟上，灑上剩餘芝士即成。
Annie：雞蛋與忌廉拌入意粉時，由於雞蛋未煮熟，當意粉放入平底鑊與肉丸拌勻時，不妨多煮一會，甚至冚蓋用慢火加熱，食落就更衞生。另外用滾水烚意粉時，記得盛起一杯煮意粉水，如意粉變乾，可用這些水略蘸於意粉上。
士多啤梨狂想
EtonMesswithToastedAlmonds
00hr20min
製作難度：★★★☆☆
份量：2人
材料
杏仁片1湯匙、呍呢拿枝1條、糖粉1湯匙、忌廉175毫升、紅莓75克、士多啤梨75克、蛋白脆餅Meringue3個
做法
1. 將杏仁片放入平底鑊，用慢火烤至金黃後攤凉。
2. 將呍呢拿枝切開，取出呍呢拿籽，加1/2湯匙糖粉及忌廉打至企身軟滑。
3. 士多啤梨切粒，加紅莓，用叉壓碎成半茸狀，再加剩餘糖粉拌勻。
4. 將果茸與忌廉拌勻，將蛋白脆餅撕碎拌入，略為攪拌後放入杯中，灑上杏仁片即成。
Annie：杏仁片烤過後會特別香，記得燒熱鑊後轉細火，不用落油，即可放入杏仁，要小心睇火，因為杏仁很容易會焦燶。
希臘沙律
GorgeousGreekSalad
00hr20min
製作難度：★★☆☆☆
份量：2人
材料
牛油果1個、檸檬1個、乾牛至1湯匙、洋葱1/2個、番茄4個、發達芝士150克、黑橄欖50克、生菜1個、麪包1/2個、紅酒醋/鹽/胡椒粉/橄欖油各適量
做法
1. 將麪包撕碎，放入平底鑊用慢火烘至脆身微焦後盛起。
2. 檸檬刨皮後，榨汁拌勻；牛油果開半去核後，將果肉刮出切粒，拌入2茶匙檸檬汁略醃；洋葱切薄片，加紅酒醋、鹽及胡椒粉拌勻略醃；番茄及黑橄欖切粒。
3. 將乾牛至拌入剩餘檸檬汁，倒入三倍份量橄欖油，再加鹽及胡椒粉調味。
4. 然後加番茄、黑橄欖、牛油果、生菜及洋葱拌勻上碟，最後灑上已烘香的麪包及芝士即成。
Annie：牛油果切粒之後，記得加少許檸檬汁略醃，這樣可防止牛油果變黑，上碟時就更美觀。