剛踏入37歲的孫耀威，於36歲時作了新歌《36》，高呼很乾燥，單身寡佬的生活悶到嘔，想結束鑽石王老五生涯成家立室。雖然孫耀威恨拍拖，但他自爆曾被愛侶背叛，發現女友在情人節打電話給第三者，所以他選擇女友，首要條件是專一。
孫耀威新推出的唱片，他包辦歌曲創作，全是譜出自己的心聲。外表大唔透的他，對愛情很保守，在歌曲中透露想結婚。孫耀威說：「30幾歲人，升職加薪，搵個好老婆，買樓生仔，然後賣鹹鴨蛋，好似係方程式。其實每次拍拖，都有結婚念頭。如果搵到一個啱嘅人，我會完全奉獻自己，我乜都畀晒佢，大家之間冇秘密融為一體，有福同享有難同當。」
望愛侶專一
在愛情路上孫耀威曾被背叛，對於未來老婆，他只求專一，他說：「以前喺內地拍劇，有個固定女朋友，但佢一腳踏兩船。有次我睇電話單，見到情人節佢打長途電話去比利時，之後先打畀我，睇到真係晴天霹靂，喊足一晚喊到崩潰，點都唔肯出房拍劇。」
孫媽媽催婚
找到好的情人可遇而不可求，但孫耀威母親比他更心急，他說：「媽咪近年成日掛喺口邊，狂叫我結婚，近期仲開Turbo，仲話買定粒鑽石畀未來新抱。」問到陳美詩可會是他的結婚對象，孫耀威說：「緋聞嚟嘅，拍拖要好好經營，急唔嚟。」
採訪：王連連
攝影：林德雄
服裝：JFT 場地：日航酒店