4月將是2010年中港投資市場一個重要月份，有機會為全年走勢定調。近日見高唱好的坊間評論直指牛市已進入第二期，講到實贏咁款，其實大家日日喺公司見到嘅係人定係鬼都未知，何況係股市牛定熊？壞消息總係失驚無神爆出嚟，A股經歷06及07年大牛市後，08年由5522直插至1664就係咁解。
有人話內地股市跌咁多，係因為冇期指可造淡對冲所致，又係似是而非嘅表述。自06年上海宣佈籌建金融衍生品交易所後，新加坡搶閘推出新華富時中國A50指數期貨合約，係第一隻A股期指。其實內地資金喺未有股指期貨之前，要沽空造淡，根本早已南下炒A股ETF或到新加坡發財。
因此，憧憬股指期貨初段開通即迎來爆升，理由唔充份，一來大戶唔會咁遲至部署，二來期貨開通初期一切維穩，若股市因期指而大上大落嘅話，同中證監穩定市場嘅原意背道而馳。
中證監嚴控炒唔起
試行中嘅融資融券，即係我哋講嘅孖展同沽空，幾日嚟融資規模只得1451萬元（人民幣．下同），絕大部份係造好倉，只有2.4萬元係沽空，全因為中證監嚴防出亂子，規定只有少數股份可供借貨沽空。目前6間試點券商可供孖展造好倉（即融資），加埋約90隻，而可供借貨沽空（融券）嘅竟然唔夠20隻，實際有貨可借嘅數量更少，即市波幅欠奉亦令投資者卻步。
有內地券商統計各地推出期指後市場表現，除咗南韓，絕大多數市場喺期貨推出後一年都升，但蜜月期過後通通股災式下跌。香港期指喺85年5月6日正式推出，大牛市蜜月期一直炒到87年10月16日股災爆發，其間跌超過52%，投資者到今時今日仍驚魂未定，危機意識肯定高過樓市炒家。正所謂「上帝要你滅亡，必先要你瘋狂」，股市首季已經跑輸，股指期貨加埋人民幣升值預期，睇怕恒指起碼要升到3萬點至開始令人迷失理智。
胡孟青