夠Car事：優點3+7　BMW535iA勇猛闊落

夠Car事：優點3+7　BMW535iA勇猛闊落

等了又等，BMW全新5系終於登場，跟宿敵E-Class正面交鋒。比人遲一年，幸好帶嚟更多驚喜，用上7系長軸闊落優點，再搭3系Turbo猛勁，新5系夠晒好揸好坐，又長又斜嘅車頭大轉款，感覺更係型到入骨。

記者：徐影龍
攝影：周旭文
Model：Michelle@PureModels

3系動感操控

寶馬5系大轉款，又真係變化得幾厲害。第一眼望到係車頭，雙腎式鬼面罩，襯兩邊修長頭燈，一字排開，沉穩中流露豪房霸氣。下方氣壩位亦如GT般，換上一大幅網狀欄柵，左右各襯型格霧燈，感覺相當討好。最特別係長長頭冚位，具肌肉骨位之餘，傾斜角度亦頗明顯，直接增加5系嘅動感味道，不論你接唔接受咁大嘅轉變，起碼新5系的確有煥然一新之感。

■天窗開閂全電動，稍有不滿係面積細過GT版。

最頂級550iA未到，今次試車型號為535iA，當知道佢好突破咁用上7系底盤，成架車加長咗，第一樣想試嘅係操控感。雖然3.0L直六偈跟同級死對頭E350嘅3.5LV6有距離，但搭番個TwinPowerTurbo增壓，馬力卻稍大於E仔，而且1,200轉就達到400Nm扭力峯值，真係輕輕踩吓油已有雄厚爆炸力。難得係車身長咗，重量保持50:50完美分佈，操控上仍然矯捷，可算成功集合3系及7系優點於一身。

■後排中央唔係一堆冷氣音響掣，而係更實用嘅置物格。

■屬附加配備的監察鏡頭，望勻全車360度，泊位、小路出大路都可更安心。

■如海豚聲納般，附近有乜障礙物即刻會「咇」你。

■用上7系嘅黑底錶板，仲有中文提醒你注意事項。

■新嘅過線警示裝置，當你不當地踩線，便會震動軚盤提醒你。

7系豪華上身

望過玩過，停落嚟慢慢欣賞內櫳設備有幾豪華。車身加長44mm，再擴闊14mm，內櫳完全受惠晒，不論前排或後排，坐上去唔頂腳已屬必然，Model對腳仲要蹺嚟蹺去都好輕鬆，唔講仲以為坐緊最豪嘅7系。同樣嚟自7系嘅，包括內置硬碟嘅新一代iDrive、10.2"彩芒、三幅式真皮軚環等。廠方為將5系豪華度提升，提供一大堆附加配備，如行車模式選擇、360度環迴鏡頭、過線震軚警示系統、電索閂門系統、電動尾冚等，應有盡有，對心儀7系豪華設備，但又唔想揸咁「老細車」嘅人嚟講，新5系實在Fit到漏。

■Option配備Sport模式，
令5系一樣充滿玩味。

■尾燈造型又係近似7系，尾喉為左右雙出式。

■駕駛艙跟早前嘅GT版相若，熟口熟面勝在親切就手。

規格

引擎：2,979cc直六Turbo
馬力：306hp/5,800rpm
扭力：400Nm/1,200-5,000rpm
傳動：八速自動波，後驅
售價：$738,000起　查詢：BMWHK（25776168）

■尾箱頗具深度，幾乎要捐入去先攞到個手袋。

■除保留家族式鬼面罩外，新5系變得更修長及具動感。