早前陳志雲被廉署拘捕後不久便舉行記者會，他的一番話：「如果你都遇上咗一啲變化，一啲莫名其妙嘅變化，請你唔好驚、唔好亂、唔好放棄，因為真的假不了，假的真不了。」這番話不但成為全城熱話，更刺激了詹瑞文於三日內決定將記者會搬上舞台，他屆時會化身陳總向觀眾揭露藝人記者會背後的秘密。
詹瑞文本月尾會舉行《真的等不了》記者招待會舞台版，他原本打算休息一年就轉型幕後策劃，誰知陳志雲因涉嫌貪污被捕後所舉行的記者會令他起了變化。
詹瑞文日前接受訪問時說：「嗰個記者會等於一個舞台，大家睇到嘅陳志雲好似好平靜，但我睇到佢內心嗰種情緒係幾咁澎湃，喺度周圍摑人，仲要係兜巴兜巴咁摑，其實佢喺度宣戰。可能佢嘅對象係媒體、係篤佢嘅人都唔定，最後佢以真假起個命題，睇得出佢係一個好叻嘅人。」
獨享發言 怕問中要害
之後阿詹用了三天時間做市場調查和租場地，最後決定舉行《真的等不了》舞台版，他強調舞台劇不是針對陳志雲，而是近年來記者會風氣十分盛行，已成為市民熱烈討論的話題，他說：「好多人都問過我係咪借呢個劇抽陳總水，咁我以前扮曾蔭權去諷刺社會，唔通又抽佢水咩。」
阿詹續說：「呢個劇我想話畀大家知記者會背後有好多嘢係大家睇唔到，當中包括有掩眼法，將問題嘅重點轉移咗去另一度。好似有一個人成日做善事，佢架車撞到人，警察唔會因為佢做得多善事而唔告佢o架，只係大家未必睇到開記者會嗰個人將表面上唔合理嘅事變得合理化。」
阿詹又認為開記者會的人不設提問，目的是想擁有個人的發言權，不想給記者問到事情的中心，這也是視線轉移的一種。他又強調以往陳冠希和鍾欣桐等藝人的記者會他都有留意，但衝擊不及陳志雲的來得大，他也希望請到陳志雲欣賞演出。
採訪：李珮洳 攝影：黃文成
