過去呢兩個禮拜，敏妮喺股票投資上咗兩堂寶貴嘅課，當然上堂就梗係要交學費。
首先係上次提到敏妮訂咗「報告王」SMS短訊服務，收到佢哋話摩根士丹利首次畀海爾（1169）買入評級，目標價睇6蚊。敏妮見摩笛一向好靈，所以小注跟吓，結果兩日升咗超過半成，敏妮匆匆食糊，點知隻股越升越有。呢個情況相信好多散戶朋友都試過，人哋話贏谷輸縮，點知落到場炒，贏少少就縮。問題係個個都好似敏妮咁，怕本來有得賺，到頭來唔肯走，結果由贏變輸。
學習注碼控制風險
股王A聽到敏妮咁講，就叫敏妮好好學習注碼控制，「點解一次過沽晒？可以分注沽，投資最難係衝破心理壓力，分段沽售，即使剩低嘅股份無力再上，因為你已經沽咗部份貨獲利，會較從容做投資決定。如果隻股真係有力上，你又可以食盡升浪。」
注碼控制除咗食糊時分注，買入時亦可以咁做。同樣係「報告王」嘅推介，早前大摩將聯邦制藥（3933）嘅目標價由5蚊，調高至7個半，仲將投資評級由與大市同步，調高至增持。又係大摩，敏妮當然想跟，點知開市無耐已經升咗好幾個巴仙，敏妮「畏高」唔敢追，點知越升越有。
同股王A呻走寶，股王A再重申以注碼控制風險嘅重要性。諗番轉頭，當時聯邦制藥股價由開市5.65蚊，急升至約6蚊左右，升咗咁多，嚇窒敏妮。不過如果以大摩7個半嘅目標價計，潛在升幅仲有25%，即使用番當日開市價做止蝕，幾毫子跌幅博個幾升幅，應該博得過。怕高追首注唔買咁多，確認仲有得升先加注，係贏少咗，但好過睇住隻股升，但自己冇份贏錢！
溫敏妮
http://wanmanli.com/blogs/