今日推介一隻可食大茶飯嘅冷門股，就係安中資源（1229），昨日衝破4元大關，最高4.12元，收4.10元，大升0.40元，升幅10.8%。高回報自必然係高風險，但小玩怡情，先定止蝕位，再上移止賺位，則風險減到最低，賺大錢機會就最大。
安中係一隻將會大舉轉型、日後會脫胎換骨的變身股。未講佢之前，先睇一睇中石化（386）最近的一單百多億元嘅大交易。
上月底，中石化獲母公司中國石化集團注入非洲西南部安哥拉石油區資產，總代價24.57億美元（約167.8億元人民幣），有關資產在安哥拉18區塊，分東西兩區，英國石油（BP）佔有50%權益，而中石化集團與安中控股合資成立的SSI持有50%，其中中石化集團持有SSI55%權益將全數注入中石化，而持有SSI45%的安中控股，就係安中資源嘅大股東。
安控旗下的附屬及聯營公司多達數十家，收購安中資源係由安中國際石油出面，安油主要業務為勘探、開發、生產及銷售原油、物業及酒店投資以及投資控股，第2大股東係SonangolE.P.，持有30%權益，SEP係安哥拉全資國有公司，負責管理安哥拉的石油及天然氣儲備。
成交倍增動力強
安中控股業務多元化，資產雄厚，單係上文提及的一個石油區塊（佔22.5%權益），已值20億美元，其業務除在安哥拉外，更擴展到南美洲同亞洲，包括委內瑞拉、新加坡和香港等地，保守估計其資產總值應在100億至200億美元之間。集團08年初收購雅域後改名安中資源，成為集團在亞洲的唯一一間上市公司，市場憧憬安中資源將會大變身，絕對合情合理。
安中資源易主已兩年，注資時機亦已越來越成熟，上月股價有異動，由2元衝上4元水平，必然有因，在高位消化完成後，昨日又一支大陽燭破位而上，成交亦倍增到210萬股，動力強勁。安中兩大股東合共持有84.2%股權，街外貨源極疏，股價一起動，升勢可以好誇張。
郭兆誠