華爾街股市睇落好似幾強勢，道指在11000點附近徘徊，坊間對後市睇法不外乎兩款，就係繼續睇好升破萬一點，以及現水平隨時見頂回落，總之無論後市點行，相信都會對港股構成影響。以現時呢種形勢，股海眾說紛紜正常不過，驟聽之下好似講廢話，不過股市唔係上就係落，但二分一機會都可以考起唔少人。
港股昨日下跌61點，收21867，強勢仍在，只係成交比前日縮成差不多200億元，其實反映沽壓唔算好大，相信大市略為消化早前升幅，回氣後將再衝22000點。
內地男士服裝股利郎（1234）走勢真係「狼」，昨逆市急升9%，收報9.18元，似乎股價唔見雙位數唔肯罷休。集團早前公佈業績，全年純利同比大增97%至3.03億元人民幣，表現優於市場預期，難怪股價走勢咁強。
利郎銳意成為「內地Armani」，又打算進軍女裝業務，前景可看好，待股價回吐可買入，短炒目標先睇10元。
方星俠