放完長假返來，港股挾高近400點，恒指逼近22000點。望返轉頭，3月份大市悶局一場，踏入4月港股即見突破，莫非真係復活節效應令大市復活？最令散戶可喜係大市成交急增近900億元，照咁睇4月份大市可能真係會先行炒上，摸一摸高位至算。
各類股份表現百花齊放，唔少創出一年新高，例如體育用品股特步（1368）高收6.30元，升近3%。另外，期內公佈業績之相關股份亦見異動，好似新華文軒（811）宣佈派高息，股價急升5.2%，收報4.04元，反映肯做功課跟進業績股，隨時有唔錯回報。
第一拖拉機（038）受惠國策扶持，係去年升幅最大的國企股之一，該股快將公佈業績，照計唔會失禮，事關一拖去年上半年純利激增1.2倍至1.88億元人民幣，故全年成績表值得憧憬。
另外，集團計劃返內地發行A股上市，炒完業績之後都仲有話題跟尾，昨升1.6%，收報6.08元，已見熱身，現價追入，中線上望52周高位6.65元。
方星俠