夠Car事：一套五件靜變動　辣妹黐埋身

日產架Tiida十零萬係幾抵，好老公好爸爸會Buy，但如我般單身一族，夢想有辣妹陪遊車河嘅，始終嫌佢太溫文。代理架新版Dynamic就唔同，一套五件包圍改件，將Tiida車格由靜變動，但唔會過火變飛仔車，估唔到Tiida一樣囂得起。

記者：徐影龍　
攝影：譚盈傑
Model：Paris@PureModels

之前長測過Tiida，16萬幾車價，畀到高級四門車格局過你，對家庭客或代步人士嚟講，已經無乜好投訴。若然你同我一樣，始終想揀架跑款小小嘅車，Dynamic版Tiida又幾值得考慮。事關代理合誠汽車搞咗套改裝料落架Tiida度，包括前後唇、兩邊裙腳同尾翼，一Set五件，唔算大改，卻硬生生將Tiida由家庭車易容成「動感一號」，每個改裝件都有黑邊或黑框相襯，由線條到配色均充滿辣味，喺前面睇幾乎唔認得係Tiida。最重要係代理繼續玩割喉，Dynamic版只比普通版多$8,888，而且質量又有保證，有別於國產包圍或街邊手工裝嵌咁兒戲。

■外裝夠Cool，實際揸起嚟一如過往，簡單易操控。

■本身已配白錶板，襯番晒Dynamic版嘅跑味。

■內櫳無改動，座椅保留半皮半絨物料。

■雖然唔包Dream輪圈同205/45ZR17胎，不過襯落又幾靚。

動感外形溫柔車廂

Dynamic版只針對外觀嚟改裝，內櫳其實跟普通版無分別。早前已長測過普通版Tiida，今次代理將Dynamic版額外換埋胎軨同TeinSuperStreet懸掛，操控上當然更有玩味。但我仍然欣賞Tiida嘅淡定同寧靜，始終香港地人多路窄，架車改得越辣就越嘥，個樣型仔已經好夠，1,500cc慳牌費、Green引擎同X-CVT波箱更慳油，可以心情舒暢溫柔地享受揸車樂趣，呢幾點對日常代步車嚟講就更重要。四門房車、五門揭背Tiida都有Dynamic版，後生仔出新車基本上都無乜好考慮，係要諗吓愛揭背定愛房車啫。