歲月神偷偷走咗71歲老媽嘅青春，但偷唔走老媽嘅撚手小菜，只要佢煮一煲平平常常嘅番茄薯仔湯，我哋姊妹幾個一邊飲住番茄甜湯，就諗番細個媽媽揹住我哋煲湯嘅樣。呢啲嗒落有味嘅住家菜，真係買少見少。好在慈善團體「全人藝動」搵咗一班老人家講出佢哋每個人嘅小故事，同埋每個老人家念念不忘嘅撚手小菜，結集成一本不一樣的菜譜《老爹媽思廚》。
難忘水牛奶浸粟米
小妹噚日同其中一位78歲嘅李羨有婆婆傾吓佢所炮製嘅住家菜心得。佢話未嚟香港前喺新會河塘啲鄉下出生，家裏好窮，以種粟米維生。佢10歲就出嚟幫手落田，食嘅只有粟米飯。有一次見牧牛童放水牛行過屋企，靈機一觸用粟米換啲水牛奶，再浸粟米咁食，「啲即榨水牛奶飲落口暖笠笠。」
李婆婆話，40年代佢走難嚟香港，就冇飲過咁鮮味嘅水牛奶，冇食過咁粉軟嘅粟米。兒時嘅美食，記錄住佢嘅青春歲月，李婆婆決定改良成鮮奶粟米雞湯，以粟米、紅蘿蔔同雞一齊煲湯，最後加入鮮奶，一家人享用，又好飲又窩心。李婆婆即場又示範另一道拿手菜鯪魚球生菜豆腐煲，聞到香味投晒降。
書商mccmcreations出版人陳麗珊話，呢本菜譜下周公開發售，價錢165元，寫晒每位耆英嘅古仔同撚手菜食譜，小菜味、人情味，越嗒越有味。查詢31064010。
電郵：mailto:[email protected]