補選今日截止提名，噚日好似驚蟄咁，好多奇人異士蒲頭報名，人稱「奇人富商」嘅郭兆明出選九西，政綱自稱「喜好聲、色、犬、馬、冶遊之閒人，不宜擔任光環公職，若能零票紀錄落選，留一佳話，足矣！」
郭兆明對手之一白姐姐人亦剃其頭，噚日被一位自稱楊太女士追擊。楊太高舉一條藍色底褲，手持「替天行道，橫掃黑白女巫」、「貪濫兼厄（呃）稅，教壞年青人，專叫人離婚，道德先淪亡」口號紙牌抗議，指白姐姐參選「侮辱香港人智慧，失禮全香港婦女。」條藍底褲則係送畀法律超人謝偉俊嘅，搞到白姐姐匆忙避走。
幾年前活躍一時嘅廠佬佘繼標銷聲匿迹，細佬繼泉搭上鼠王芬西九新動力，噚日亦出選九西，坦言參選係想「出吓名」。港島除陳淑莊外，前區議員戴卓賢、報稱做會計嘅黃興都喺噚日交表；前社民連黨員李世鴻出選新西，衝着陳偉業而來。