拜山之後，到沙田馬會飲茶，碰到好多熟人，其中一位揸住報紙睇時事評論，講及「台灣雙英辯」，即馬英九與蔡英文辯論。馬英九梗會爭取連任，民進黨方面，如果黨主席蔡英文可以搞掂原四大天王退隱，自己上陣挑戰馬英九，就一定出現一場「雙英」競選辯論大戰啦。但兩年後之事，好難預料，如今一場ECFA大辯論，已逼在眼前，就係民進黨藉ECFA反國民黨，雙方主席會就ECFA來一場口舌之爭，雖然以經濟為主，但難免唔會觸及統獨問題，馬英九不知如何招架。呢場「雙英辯」必定轟動台灣，如果馬英九輸咗，二○一二年佢就危危乎。
另一位老友A就話，台灣有雙英辯，香港何嘗冇吖？到咗二○一二年特首競選季節，出現唐英年大戰梁振英，或者好難避免喎。諗真吓，香港雙英辯幾有可能，但與台灣唔同嘅係，可能會加演一場「雙英戰呂布」，公民黨梁家傑再次參選，惡戰唐英年、梁振英。
老友C就以為不會，佢指到時八百名選委之中，如已分別提名唐英年、梁振英兩人，未必會有足夠提名票流往梁家傑（或李柱銘或陳方安生或黃毓民等等，相信泛民到時會派人參選，攪吓局都好）。老友C嘅預測多數啱，二○一二年特首競選，最有可能嘅情況就係雙英辯，除非到時曾子後人之中，有一位出嚟競選。
香港雙英辯邊個會贏，認真難估。一位傳媒界高人自非政府人士方面聽到消息，指唐英年做特首之呼聲最高，其他有志之士最好審度時勢，知所進退咁話，最終消息來源係地處北方喎。呢啲消息是否可靠，幾難講，不過隨住倒數日期縮短，更多消息會傳到禾雀亂飛。一位銀行界老友話：「下次嘅消息來源會係華東某大埠，振英哥仲有機會喎！」眾人聞言大笑，齊齊話不如估吓四月二十五日跑女皇盃，邊隻馬可以贏大賽好過！今時今日仲有「女皇盃」國際賽之設，充份證明鄧小平之「馬照跑，舞照跳」大原則，行之有效，馬會乃一國兩制之具體表現。