內地福彩股全面起動，升幅排前列的係華彩控股（8161）（升10%）、第一視頻（082）（升9.6%），以及御泰中彩控股（555）（升5.1%）。華彩控股升勢最勁，勁得有理，因為拍埋一比，佢唔單止大落後，今年且開始進入收成期，以現時水位計，升兩三個開，好閒。
先睇今年嘅表現。第一視頻去年底收1.79元，昨日收3.18元，升幅77.6%；御泰由0.87元升到1.23元，升41.3%；華彩則只係由0.34元升到0.385元，升得13.2%，遠遠大落後。今年1月底，股價曾一度升上0.51元，其後因母公司寶威（024）20送9華彩股份出籠，打回原形。
送股之舉，無疑係令供應增加，但對華彩而言，實際影響並唔太大，起碼寶威大股東陳城已收咗近一半股份，流出街嘅只係10億股左右，市值3億多而已。
華彩係基金股，現時除大股東陳城持有約29.5%股權外，其他持有逾5%而需要申報的基金有6個，包括西京、摩根大通、大摩同LeggMason等，已合共持有約47.3%，加埋已接近77%。華彩發行74億股，街外流通量約23%，即只有17億股，市值只6億多，相信有唔少亦已落在「未過界」嘅基金手上，噚日成交大增兩倍到9000萬股，有心人再收多一「浸」，好易收乾。
業務再進入坦途
再睇埋公司個「晒士」，第一視頻發行23.5億股，噚日計市值74.7億元；御泰76.5億股，市值94億元；華彩74億股，市值28.5億元，大家拍住跑，華彩上升空間最大，亦係最抵買。
華彩係早期已打開內地福彩市場嘅公司，其後有一段時間業務有阻滯（如果唔係，股價點會咁低？），但最近大半年來，業務又再進入坦途，飛躍發展，分別取得重慶、天津同寧夏回族自治區授權做福彩，而且亦係可以用電話投注同手機購彩嘅公司，今年料可轉虧為盈，會令人刮目相看。
華彩收集完成，一衝上0.40元，即確認開展大升浪，第一個目標係0.70元，以上移止賺位持有，到價後再定去向。
郭兆誠