【本報訊】立法會五區補選提名期今天結束，四名公民黨及社民連前議員昨天分別循原區報名參選，連同早前已報名的社民連梁國雄，五人無懼中央及特區政府打壓，決意向5月16日公投之路進發。五人預期未來個多月針對他們的人身攻擊、抹黑與打壓必定不斷升級，但五人必定要完成香港首次公投，令市民能以手上選票表達爭取雙普選、取消功能組別的決心。
記者：許偉賢、林俊謙、莫劍弦
公民黨兩位已辭職議員港島區陳淑莊及九龍東梁家傑，昨晨到所屬地區的民政事務處報名參選。打頭陣的陳淑莊選擇早上9時報名，獲黨高層如黨魁余若薇、主席關信基及立法會議員吳靄儀到場支持，連住在九龍東的長毛梁國雄也專程趕到香港仔為她打氣。
陳淑莊：每一步都唔輕易走
由公民黨在黨員大會決定參與五區公投至今逾200天，陳淑莊指每一步都「走得唔輕易」；尤其是決定參與五區公投運動後，她曾被掟水彈及吐口水，證明任務相當艱巨，但她慶幸仍有機會啟動公投，讓選民終可在5.16投票。
廢除功能組別是今次公投運動的主要議題，昨天報名循九龍東參選的公民黨梁家傑重申，掌握特權的功能組別完全操控立法會，「結果出現咗好多不利民生嘅政策」，呼籲選民為廢除特權而在5.16積極投票。社民連主席陶君行及其黨友，連同民主黨數名九東區議員也陪同梁家傑報名，以示對公投運動的支持。
社民連方面，創黨主席黃毓民在妻子和逾50名黨友陪同下，高呼「明知山有虎，偏向虎山行」口號報名參選，他預計政府對他個人、甚至家人的打壓陸續有來，「我哋不怕打壓、不怕抹黑，家已經有人諗住對付我嘅家人，我都唔驚，置生死於度外，一定要完成今次神聖嘅歷史任務。」
對於出選的九龍西成為目前為止最多人參選的選區，黃毓民感到高興，又表明不怕挑戰，「如果喺五區公投運動，毓民係重點打擊對象，呢個係我榮幸，夠膽你就嚟攞票。」他又反駁外界指他為議會帶來「暴戾政治」，「我暴戾得過一黨專政？暴戾得過捉毒奶粉受害者坐監？暴戾得過判劉曉波坐11年監？」他呼籲市民積極參與投票，「如果大家都放棄呢個投票權利，就係自掘墳墓、自尋死路。」
陳偉業：我同長毛壓力極大
社民連陳偉業昨日報名出戰新界西，他相信五區公投運動中，「社民連三子面對嘅抹黑打壓，一定係歷來之最，好明顯對手今次策略係要打擊社民連。」他又指，相信在親共陣營打壓下，社民連新界東及新界西選舉失陷的機會頗高，「我相信同長毛喺跟住嘅日子，壓力係會極大。」
選舉事務處昨天除了收到公、社兩黨四人提名表，也接獲六份參選提名，包括於九龍西參選的白韻琴、商人佘繼泉及獨立人士郭兆明、循港島區出選的獨立人士戴卓賢及黃興，以及出征新界西的社民連前成員李世鴻。
公投五子一人一句
公民黨 梁家傑
「好希望所有支持民主、支持廢除特權嘅九東朋友，都可以為公道喺5.16補選日出嚟投一票。家工商界完全操控同民生有關嘅政策，結果出咗好多不利民生嘅政策。」
公民黨 陳淑莊
「今次補選唔係一個偶然，係我哋好希望盡快實現真普選，呢個公投亦唔單止為我呢一代，而係為下一代建設更公道嘅政策。」
社民連 陳偉業
「過去面對咁多次選舉，呢次選舉心情最複雜同壓力最大，因為過去嘅選舉只係個人得失，但今次係代表成個公投同香港民主運動嘅得失。」
社民連 黃毓民
「如果毓民係重點打擊對象，呢個係我榮幸……我哋不怕打壓、不怕抹黑，家已經有人諗住對付我嘅家人，我都唔驚，置生死於度外，一定要完成今次神聖嘅歷史任務。
社民連 梁國雄
「我選擇愚人節（4月1日）報名，就係呼籲政府唔好喺政改問題上愚弄市民，無法無天，我希望選民以『長毛長征長精神、一人一票一條心』嘅精神支持公投。」
