真係同人唔同命，本來同樣被視為薛家準新抱的陳法拉、諸葛梓岐，如今命運迥異，諸葛梓岐面臨分手邊緣，另一邊廂的法拉感情穩定兼事業得意。噚日法拉容光煥發，着住條銀光閃閃連身裙同陳豪一齊出席跑馬地愛彼錶女皇盃記者會。
法拉首次擔任愛彼錶女皇盃宣傳大使，拍電視廣告又影宣傳海報，相比起視帝陳豪，有過之而無不及，所以法拉都好識做，唔賭馬都要話自己想養馬，佢話：「我身邊冇乜人賭錢，不過自己都好鍾意馬，爹哋、媽咪喺嗰邊有牧場都想買隻馬養！」
陳豪冇賭運
對於有報道指諸葛梓岐因為周圍唱法拉同薛大少已婚，搞到一向鍾意低調的薛家好高調，薛老太唔多喜歡，所以薛二少最終決定要同諸葛梓岐分手，法拉話：「有睇報道，我唔會回應！人哋嘅事。」而法拉仲好堅定咁否定人哋分手係關佢事，佢話：「我冇諗過，唔會諗咁多嘢！」被指係迎合薛家低調作風，法拉仲係好自我咁話：「我覺得我唔需要，我只係會回應我自己嘅嘢。」
此外，陳豪甚少賭錢，佢話：「好似嗰時想學人賭馬，又俾人嫌我煩，去澳洲入賭場贏咗對波鞋最終俾人偷咗，所以我都係唔賭好過賭。」