正當黃毓民忙於補選公投之際，佢位於旺角間牛肉麪舖卻要拉閘，捱唔起貴租也。毓民噚日證實，旺角老店5月初光榮結業，因為業主要求加租6萬元至20萬元，「賣幾多碗麪先夠交租？」旺角老店開業五年，頭三年月租16萬元，後來減至14萬元，但最近業主要大幅加租，毓民話計唔掂條數，惟有離場，「呢間舖唔使蝕錢，不過搵到錢都係用嚟交租，做落去做乜？」
至於九龍城分店繼續做生意，「嗰度租平啲，不過人流都少啲。」毓民話會按法例遣散十幾名員工，或視乎需要調到九龍城工作，但暫無計劃再開新店，「我老婆睇兩間舖好辛苦，第二日係咪做多一間，由佢決定啦，我唔理嘅。」