淡友手指慘被挾斷，殺熊記令48隻熊仔慘遭殺害，連單頭股份熊仔都唔放過，全日挾升配合埋成交激增，淡友被挾至沒頂。
上個禮拜早已提到油、金、股、滙齊升嘅離奇格局，長假期番嚟後更見明顯，到底係投機炒作造成，定係真正吸引長線資金流入買貨？
資金大舉流入港股，好大程度同炒人民幣升值預期有關，即使係借美金嘅套息交易，只要喺股場上有好回報，足以抵銷美金反彈嘅損失，亦解釋到點解美金升時，股市亦有得升。
美國政客一招「以退為進」，突然喺國家主席胡錦濤訪美前落藥，話人仔升唔升值，由中國自己決定，擺明係扮熟，市場反而更相信人行會受軟唔受硬，令人民幣兌美元中間價升至一年高位，更有報道話滙改方案已上報國務院㖭。
大戶儲定貨等食大茶飯
升值，配合加息預期，人民幣資產自然受資金追捧，而當內地正式開始加息周期，炒人民幣升值嘅熱錢只會有增無減。除咗宏觀息口走勢，唔好忘記4月16日股指期貨出台，內地正式有期指炒，基金大戶終於可以倒轉頭造淡，各路人馬早已磨拳擦掌，在境內、境外儲定貨等食「大茶飯」。成手花早已盡入強者手，所以買盤一到位，市況輕易挾起。
散戶面對嘅最大挑戰，通常唔係幾時入市，或者係買邊啲股份，而係到咩位止賺。散戶調查話大把人仲想入市，大行報告更睇H指目標將見17000。市之將亡，必有妖孽，金融海嘯前唔少股份古靈精怪，被稱為妖股，近日則有創業板股風頭十足。
昨日十大升幅榜中，六成係創業板股份，升幅最大嘅北亞策略（8080），個個話有高盛做大股東肯定有後着，有冇留意人家05年100合1，然後1供1配股，當日上車嘅大戶，究竟又係唔係逼不得已？
胡孟青