大哨朗拿度自從舊年返番巴西效力巴甲哥連泰斯之後，可謂如魚得水，除咗傷患少咗、波又入多咗，日前佢老婆瑪麗亞仲幫佢生咗個千金出嚟；第3度做人爸爸嘅朗拿度不知幾開心，仲幫佢個寶貝女改名為愛麗絲（Alice），同最近上緊嗰套《愛麗絲夢遊仙境（AliceinWonderland）》個女主角同名，莫非連朗拿度都覺得自己最近順到好似夢遊仙境咁？
「我真係覺得好幸福」
聽啲巴西行家講，小愛麗絲係喺啱啱嘅周二，喺一間聖保羅診所出世；聽講小妮子個樣好精靈活潑，身體狀況仲好好㖭！唔怪得33歲嘅朗拿度一見到佢就鬼死咁開心，周圍同人講自己好幸福：「我真係覺得好幸福，家我屋企有3個瑪麗亞，老婆啦、大女瑪麗亞蘇菲亞同埋啱啱出世嘅瑪麗亞愛麗絲。」咁又係嘅，朗拿度出名中意「女」，家有3位靚女日日陪住佢，真係夫復何求呀！
朗拿度家唔止家庭生活美滿，連足球事業都相當得意呀！大哨貴為3屆世界足球先生得主，「降呢」踢哥連泰斯自然應付自如；況且今年球隊仲有大哨嘅昔日皇馬、國家隊隊友卡路士加盟，簡直係如虎添翼超晒班。
助哥連泰斯雙線進發
雖然家巴甲都仲未正式開鑼，但哥連泰斯已經喺度雙線發展。球隊近期喺聖保羅州聯賽事氣勢如虹，誓要殺入4強；而佢哋喺南美自由盃嘅形勢亦都大好，暫時以4戰得10分排分組賽A組榜首，晉級機會極高。無他嘅，朗拿度近期重拾射門鞋，「士哥」停不了，哥連泰斯想唔贏都幾難啦！
雖然巴西國家隊教練鄧加已經暗示，唔會選呢位踢埋今季就退休嘅「球王」出戰今夏南非世界盃決賽周，不過大哨家家庭事業兩得意，況且世界盃佢都贏過兩次啦，少少遺憾，相信佢都唔會太過介意嘅。