網名「馬草泥」嘅維園阿哥任亮憲去《城市論壇》踩場火速上位，近日頻頻喺傳媒曝光，佢係社民連擁躉，噚日毓民報名參選，馬草泥都有到場，佢話雖然平日要返工，不過會抽時間助選。
申請加入社民連
唔講唔知，原來馬草泥正申請加入社民連，佢仲透露正考慮明年出選區議會，但唔肯透露出選邊區，社民連秘書長季詩傑指馬草泥負責「打怪獸」！既然揚名於維園，八方強烈建議佢出選維園區，做個真正維園阿哥。至於會唔會選立法會，馬草泥笑言：「梁振英同唐英年會唔會選特首，都唔會家咁快講啦！」唔知佢係咪N屆都唔參選呢？
馬草泥父親係末代立法局議員、一二三民主聯盟創辦人任善寧，傳授佢從政錦囊，「千祈唔好學程介南，一定唔可以將從政呢樣嘢當係搵錢維生，一定要心存犧牲態度，以回饋社會、服務社會嘅態度服務市民，咁至可以堅持自己目標同理念，其實不論從政同做人都係咁。」