【記者白琳報道】facebook網民早前設立群組，成功爭取民建聯成為10萬人厭惡黨。為紀念這歷史性時刻，群組發起人推出10萬張「禮義廉」證書，售價「廿蚊張」，目標籌款200萬元，把純粹惡搞升格至監察民建聯運動。發起人計劃用部份收益推動五區公投運動，惟擔心遭保皇派抹黑，正仔細研究選舉條例。
「茲證明民建聯成功爭取閣下＿＿＿成為《我相信我可以召集100,000個厭惡民建聯的人》FACEBOOK群組成員」證書設計初稿前晚在facebook出爐，群組發起人KelvinSit向本報表示，至昨日傍晚有120人透過facebook及電郵報名訂購，「暫時只係同朋友宣傳，反應已經咁好。」
加綠公仔諷「成功爭取」
KelvinSit說，印在證書初稿、與民建聯標誌相似的禮義廉標誌將會稍作修改，以免民建聯再度向海關舉報侵權。證書下方有北極企鵝及最無恥印章點綴，「圖片幾有趣，令人聯想到民建聯係點樣嘅組織。」正式證書將會加上行人過路燈「綠公仔」圖案，諷刺民建聯有黨員自稱在旺角「成功爭取此綠公仔燈延長兩秒」。
證書設計還在草擬階段，KelvinSit預計最快下周開始收取款項及郵寄證書。他與10多名搞手計劃以非牟利形式，利用證書所得收益與社運團體合辦活動，並深入研究涉及民建聯的議會紀錄、公開言論及政綱，「監察民建聯一舉一動，睇佢哋有冇前言不對後語，係咪真係成功爭取，有冇違背市民期望。」
捐助公投研究是否違法
他們現正與支聯會商討合辦六四宣傳活動，又正研究以收益捐助五區公投是否有機會牴觸選舉法例，「驚俾某啲親建制派有話柄，話我哋幫公、社兩黨籌款，點解唔申報，我哋唔想拖累五區公投。」
參與五區公投的「大專2012」上月透過facebook籌款，發起「一人五十蚊」行動，開創港人以此途徑籌募政治運動經費的先河。大專2012成員黃永志表示，當時一周內已籌得25萬元選舉按金，「好多唔只捐五十蚊，係一、二百咁捐。facebook毫無成本可言，但速度超快，一星期就籌到咁多，我哋都好驚訝。」他們計劃完成草擬參選政綱及選舉經費預算後，會在facebook發動第二輪籌款攻勢，「最理想就係將政綱寄畀所有選民，但係印嘅費用每區都要幾十萬蚊。」