蘋果iPad水貨殺到嚟，小妹噚日走去旺角先達一，部機成10吋「芒」，支援720p，睇高清片一流，加埋機身超薄，周街睇都無難度，但賣價成7,000蚊，小妹都係得個恨字。買唔到大嘅，都想買個細嘅嚟睇吓片。消委會老友話，佢哋啱啱測試咗巿面15款PMP，分細屏幕、大屏幕同埋可以Wi-Fi上網三大類機種進行播片、聽歌質素等測試，結果係蘋果贏晒。
老友話，好似細屏幕組別蘋果iPodnano總評分獲3.5星（最高5星），成為該組別評分最高嘅機王。功能多多如設有FM收音機、錄音咪、揚聲器、步數計等，有埋鏡頭可以拍短片，視像同音響質素更屬同組之冠，賣價1,388蚊。
大屏幕PMP機組別頭三位依次係蘋果iPodclassic、三星YP-R1同SonyNWZ-S545，iPodclassic嘅音質理想，電池表現唔錯，賣$1,888；三星啲聲都唔差，採取輕觸式顯示屏，加埋藍牙功能，可連接手機作免提耳筒，價錢貴啲賣$2,098。
講到可以上網嘅PMP，評分最高嘅蘋果iPodtouch、SonyNWZ-X1060同樣獲4星，兩款都係用輕觸式顯示屏操作，接駁Wi-Fi瀏覽網頁或觀看短片，其中iPodtouch可讓用家日後加添應用或遊戲程式。以價錢計iPodtouch賣$3,088，比Sony平600蚊。
電郵：mailto:[email protected]