江素惠女士傳來電郵，介紹義大利失明男高音安德烈．波伽利演唱會，分別於五月四日在香港會展及五月六日在台北小巨蛋舉行。五十二歲嘅AndreaBocelli名震全球，以古典歌劇唱功演唱流行樂、古典樂以及歌劇專輯唱片，銷量總數已超五千萬張，目前在樂壇炙手可熱，來港演唱梗會大受歡迎啦，但睇吓香港演唱會票價，最平六百八十元，最貴三千三百八十元，次貴二千二百八十元，再其次係一千九百八十元，一千二百八十元，九百八十元，嘩，幾揦脷噃。
點知收到電郵不久之後，披圖已經打電話嚟，叫左丁山一齊去聽波伽利，快啲撲飛，左丁山講：「三千三百八十一張唔捨得買，六百八十一張飛，要坐在大後方望大電視螢幕，點算好？」披圖大笑：「正孤寒鬼，唔怕話你知，三千三百八十蚊最貴門票，已銷售一空，我就買到幾張，如果你有時間去聽Bocelli，我可以忍痛割愛一兩張。」
香港人有的是錢，越貴嘅飛，越早賣晒，平民票反而未必好快沽清，對平民嚟講，六百八十元，九百八十元嘅門票，其實亦非便宜。收街坊便宜價就係一啲校友聚餐會。森哥呢位塘尾道官立學校退休教師話去年塘尾道官立辦校友重聚，成立校友會，為學校籌款在禮堂安裝冷氣機，免卻學生受塘尾道汽車噪音之苦，成果極為理想，今年再辦「校友情濃」晚宴，於四月二十四日星期六晚假旺角道/廣東道交界之「煌府酒家」舉行，餐費只收二百五十元，認真街坊價，連買半張最平嘅Bocelli門票都買唔到，抵喇啩？不過校友晚宴，著重情誼，不在乎金錢與飲食，最緊要嘅就係一份心懷母校嘅感情啫，塘尾道官立學校校友有意參加者，可上網：www.tmr.edu.hk或直接打電話23930800搵校務處郭先生查詢。與森哥傾完偈，又接教師Y來電：「喂，PeterPaul&Mary演唱會五月八日會展舉行，一齊聽吖！」教師Y昔日在大學校園攬住木結他唱500Miles，BlowingintheWind，PufftheMagicDragon冧盡不少女同學，PPM直情係佢「恩人」，而今M已過身，可能有人代替咗佢，但教師Y一啲都唔介意，相信標準PPM迷一定會到場參與「合唱」IfIHadAHammer。